Á hverju á að biðjast afsökunar?

Ummæli framkvæmdastjóra Alþjóðahúss vegna veiðibrota í nokkrum veiðiám landsins eru vægast sagt undarleg. Hið sama má segja um innlegg þeirra tveggja sem tjáð hafa sig um fréttina hér á blogginu. Málið snýst um veiðiþjófnað. Þjóðerni veiðiþrjótanna hefur verið nefnt og hvað með það? Í dag voru tveir staðnir að verki á svæði III í Stóru-Laxá í Hreppum. Þeir voru frá Tékklandi. Á að þegja yfir því?

Veiðiþjófnaður manna af erlendu bergi brotnu er orðið vandamál í íslenskum laxveiðiám. Um þverbak hefur keyrt í sumar. Ég reikna ekki með því að framkvæmdastjóri Alþjóðahúss vilji að mál séu látin niður falla vegna þess að útlendingar eigi í hlut. Íslenskir ríkisborgarar, bæði þeir sem fæddir eru í landinu og þeir sem eru aðfluttir, átta sig á íslenskum reglum. Hið sama verða aðkomumenn að gera. Sumir vita ekki betur en aðrir veifa Veiðikortinu og skáka í því skjólinu að út á það megi veiða á öllum veiðisvæðum landsins. Það er fjarri lagi því þótt Veiðikortið sé öflugt þá eru ekki ,,nema" um 30 vatnasvæði innan vébanda þess ágæta korts.

Staðreynd málsins er þessi. Veiðiþjófar hafa verið gripnir við iðju sína í ám eins og Elliðaánum, Leirvogsá, Laxá í Kjós og Bugðu og Stóru-Laxá í Hreppum. Þjóðernis viðkomandi manna hefur verið nefnt á vef Stangaveiðifélags Reykjavíkur og stjórn félagsins hefur tekið þá ákvörðun að öll veiðibrot verði kærð. Það hefur áður verið gert í tilviki íslenskra veiðimanna. Í ljósi þess að íslenskir ríkisborgarar, hér fæddir sem aðfluttir, eru sennilega meira en 95% þeirra sem stunda veiðar á annað borð þá væri það sennilega að bera í bakkafullan lækinn að taka fram í hverju tilviki, ef Íslendingar eru staðnir að veiðiþjófnaði, að um Íslendinga væri að ræða. Ég sit í stjórn SVFR og veit ekki til þess að íslenskir ríkisborgarar hafi verið teknir fyrir veiðiþjófnað í sumar. Framvegis er sjálfsagt að þess verði getið sérstaklega í fréttaflutningi á vef SVFR ef Íslendingar verði staðnir að slíkum glæpum, verði það til að kæta geð manna.

Eiríkur St. Eiríksson

Umræðan um veiðiþjófnað öfgafull

Athugasemdir

[Þórdís Bára Hannesdóttir, 20.7.2007 kl. 21:38]

Já og líka hvort þjófurinn var karl eða kona

[Óli Sveinbjörnss, 21.7.2007 kl. 00:32]

Jæja það er  greinilegt í hvaða stjórn þú situr. Það er með ólíkindum þessi frétt um veiðiþjófana. Að vera að nefna þjóðernið er bara rassitaníðingskapur og alveg með ólíkindum að lesa þetta blogg þitt í því að réttlæta það. Það vantaði bara að hefði verið sagt að það hefðu verið "Svertingjar" þarna að verki. Það sem svona fréttamennska gerir er að segja að allir Pólverjar eru veiðiÞJÓFAR. Gestrisnin er með ólíkindum hjá þessum ásakendum. Það er lítið mál að leysa þetta. Setja upp skilti með sektar og refsiákvæðum. Sá sem leigir ána á að sjá um þá vinnu. Mér finnst að Pólverjar eigi að lögsækja svona blaðamennsku um ærumeiðingar.

[Jónas Guðmundsson (IP-tala skráð) 21.7.2007 kl. 01:29]

Eh.... "Rassitaníðingur" átti þetta kannski að vera ásökun í garð Eiríks um kynþáttahatur ?    Ert þú í keppni til Íslandsmeistara í barnaskap, Óli ?  Hér er um að ræða ákveðið vandamál, sem lýtur að mismunandi reglum um veiði í ám og vötnum milli þjóða.  Það eru Pólverjar, sem eru mest í þessu, og þeir eru bara ekkert verri fyrir það.  Þeir líta bara öðruvísi á málið, og telja sig geta veitt, þar sem þeim sýnist, þegar þeim sýnist.   Af því að þannig er það í Póllandi.  Ef einhverjir eru líkir íslendingum, af erlendum þjóðum, þá komast Pólverjar í eitt af fimm efstu sætunum, vafalaust.  Þeir hætta að nenna þessu þegar þeir hafa misst stangir, afla og fengið sekt, alveg eins og íslendingar.  Hættið svo þessu útlendingapíslarvottavæli, í guðanna bænum.........